2025 թվականի հոկտեմբերի 22-24-ը Երևանում կայացավ ITU Միջազգային կիբեռանվտանգություն 2025 միջոցառումը, որը կազմակերպել էր Հայաստանի տեղեկատվական համակարգերի գործակալությունը Հեռահաղորդակցության միջազգային միության հետ համատեղ։ Արդշինբանկի աշխատակիցների մասնակցությամբ կազմված թիմը մրցույթում արժանացավ առաջին մրցանակին։
Կիբեռզորավարժությունը միավորել է առաջատար միջազգային և տեղական կիբեռանվտանգության մասնագետներին, քաղաքականություն մշակողներին, ազգային CERT թիմերին և ոլորտների փորձագետներին՝ գիտելիքների փոխանակման, լավագույն փորձի ներկայացման և միջազգային համագործակցության ամրապնդման նպատակով՝ կիբեռդիմադրողականության բարձրացման ուղղությամբ։
Այս տարվա միջոցառումը հատկապես կարևոր է Հայաստանի համար, քանի որ երկիրը պատրաստվում է ներդնել իր Կիբեռանվտանգության մասին օրենքը, որը կարևոր քայլ է ազգային կիբեռկառավարման և թվային ենթակառուցվածքների պաշտպանության ոլորտում։
«Յուրաքանչյուր հնարավորություն տեղեկանալու կիբեռանվտանգության ուղղությամբ աշխարհում ներդրվող փորձառության մասին և չափելու մեր ուժերը իսկապես բարձր որակավորում ունեցող մասնագետների հետ միայն ողջունելի է մեր կողմից»,- իր խոսքում նշեց հաղթող թիմի մասնակից, Արդշինբանկի Տեղեկատվական անվտանգության վարչության տեխնիկական ապահովման ուղղության փորձագետ Նարեկ Վարդանյանը։
Նարեկ Վարդանյանի հետ միասին առաջին տեղը զբաղեցրած թիմի կազմում էր նաև Արդշինբանկի Տեղեկատվական անվտանգության վարչության տեխնիկական ապահովման ուղղության փորձագետ Մերի Քոչարյանը։
Միջոցառման ժամանակ արտերկրից հրավիրյալները հնարավորություն ունեցան մասնակցելու ինտերակտիվ կիբեռզորավարժությանը և սցենարային քննարկումներին, կիսվեցին նորահայտ սպառնալիքների և կիբեռանվտանգության ռազմավարությունների վերաբերյալ փորձով, ծանոթացան և կապեր հաստատեցին տարածաշրջանային և միջազգային մասնագետների հետ, բացահայտեցին Հայաստանի հարուստ մշակութային ժառանգությունն ու ջերմ հյուրընկալությունը։