Հայաստանի բանկերի միությունն ամփոփել է «2022 թվականի լավագույն ֆինանսաբանկային հրապարակում» մրցույթի արդյունքները։ Կազմակերպիչների խոսքով, մրցույթի նպատակն է խրախուսել մասնագետներին, փորձագետներին և լրագրողներին՝ հանրության համար ֆինանսաբանկային ոլորտի արդիական խնդիրների մասնագիտական և մատչելի լուսաբանման համար: Մրցույթն անցկացվում է չորրորդ անգամ հետևյալ անվանակարգերում՝ «Լավագույն գիտական հոդված», «Լավագույն վերլուծություն» և «Լավագույն լրագրողական նյութ»։ Հաղթողներն ընտրվում են առևտրային բանկերի ներկայացուցիչներից կազմված պրոֆեսիոնալ ժյուրիի կողմից։
«Արդշինբանկը մշտապես կարևորել է բնակչության ֆինանսական գրագիտության մակարդակի բարձրացման և ԶԼՄ-ներում Հայաստանի բանկային հատվածի գործունեության մասնագիտական լուսաբանմանն ուղղված միջոցառումները: Մենք շատ ուրախ ենք, որ «Լավագույն գիտական հոդված» անվանակարգում հաղթող է ճանաչվել Արդշինբանկի ներքին աուդիտի ավագ աուդիտոր Արման Համբարձումյանը։ Շնորհավորում ենք Արմանին հաղթանակի կապակցությամբ։ Մաղթում ենք հետագա հաղթանակներ կյանքում և գիտության մեջ:
Բացի այդ, Բանկը սահմանել է նաև հատուկ մրցանակներ 2022 թվականին ֆինանսաբանկային թեմաներով լավագույն հրապարակումների համար։ Մրցանակները շնորհվել են Էներգետիկայի նախարարության աշխատակից Մարիամ Մոմջյանին՝ գիտական հոդվածի համար, և «Արմինֆո» լրատվական գործակալության լրագրող Կարինա Մելիքյանին՝ ֆինանսաբանկային ոլորտում ակտիվ վերլուծական աշխատանքի համար»,- ասվում է Արդշինբանկի մամուլի ծառայության հայտարարության մեջ։
